Skip to content

語言是文化的載體

2022-11-29
撰文:陳金泉
share_2022秋_陳金泉_01

〈全文以臺文書寫〉

踏話頭

佇坐捷運的時,抑是佇餐廳食飯的時,定定若聽著寡講真台語的古錐囡仔,我攏會笑笑的佮囡仔講–幾句,順煞嘛呵咾家長????????囡仔,想著以前的囡仔大多數攏聽無阿公阿媽咧講啥,遮濟年的拍拚推捒到今,總算有淡薄仔看著效果。

羅馬毋是一工造成的

台灣的過去長期間,經歷荷蘭、西班牙、明鄭、清朝以及日據時代的統治,經歷荷蘭語、日語,以及後來國民黨政府戰敗走來台灣,憨想欲將台灣當做反共復國的根據地,一切建設攏以建立軍事根據地為目的;自按呢台灣的文化就一步一步有計畫的被忽視消滅…。直至台灣人民佇語言使用上的混亂,佮語言意識的迷失,致使家己毋若袂啥會曉講家己的母語,嘛煞分袂清家己到底是佗一國人?

語言是文化的載體,是族群意識結合的根本元素,若欲保留咱遮特別的文化,就愛位搶救台語開始。毋過國民黨政府的國語政策用醜化台語來獨尊華語,予台灣人對家己的語言認為無水準無深度,無欲講嘛無欲學,愈毋講就愈袂曉講,佇惡性循環的環境下面,講欲推捒文化搶救台語,方法若無改變,效果是有限根本就無可能成功。

台語開始被重視

2000年政黨輪替,代表臺灣本土的民進黨執掌政權,本土教育的推捒才開始有所震動;毋過這20外冬來,總是因為資源欠缺,做了軟跤軟手;佳哉有濟濟本土團體攏參與佇這个工課,徛佇愛鄉土疼臺灣的心懷,熱情持續拍拚堅持到今。我有機會位頭參與逐項到今,自體制內小學、大專院校,以及佇教會社區班推捒臺語。佇小學授課的時,看著學生真歡喜咧學習臺語,但是嘛看到真濟升學主義的家長對於母語的傳承一點攏無關心;母語愛對日常生活的使用面頂來顧根本,所以思考欲按怎位社會層面來推捒台語,予家長了解母語的重要性是真要緊的。佇2017彼年,同學看我為臺語的用心,鼓勵我著來社區大學開課,深思後知影著位社大來向一般的民眾推捒講母語的重要,才開始我佇社區大學的課。

喚起對這片土地的情感

為著欲予民眾對臺語有興趣,課程就對「瞭解臺語的媠」佮「臺語的重要」來設計,主要訴求是欲予讓社會大眾接觸臺語文的學習,通過學習發掘臺灣文化佮語言的媠;我佇社大的課程位萬華社區大學開始,毋過初期因為逐家對臺語學習猶無清楚,普遍感覺無啥通學(臺語無字會曉講就好),佇社會無啥使用的必要性(急迫性),招生發生淡泊困難,佳哉有社大同仁佮學員逐家同心協力推介,開課才慢慢穩定落來;因地緣關係,後續閣佇新中和及文山社大開課,受著社大同仁的協助,同學的熱情參與及回饋表現,社區大學的邀課嘛毋捌中斷;2018年底,國家語言法通過,臺語成為國家語言之一,母語嘛變作佇國民義務教育中的必修課程,隔轉年公視臺語台成立,社會上對臺語專業人員的需求是愈來愈濟;我本身佇教授臺語的課程已經有長年的經驗,佇教會中教導培育主日學的臺語師資,同時嘛予社區大眾會當參與學習;因為配合著對臺語師資的需求,就受邀佇新中以及文山兩个社區大學開設臺語師資培訓班,自開設了後就報名熱烈,學生佇課程間互動熱絡,佇歷史、地理、人文攏有豐富的分享佮討論,毋焦建立起深厚的感情,嘛漸漸—仔喚起民眾對這片土地的情感;而且咱這个課程,嘛已經有30外位的學生通過母語認證並且正式進入各級學校的教學職場中(若加以前已超過百人),從事母語教學傳承的工作,就臺語的普及會當有按呢花開並茂的結果,對本人看作是使命工課來講,實在是一个真使人滿足的回饋!

平時嘛鼓勵學員投稿嘛報名參加教育部局的語言競賽,攏有提著獎賞;前站仔學員閣組隊參加公視臺語台的入圍金馬獎的臺語益智節目「全家有智慧」,首獲該節目開播以來上懸的獎金,實在足歡喜。

社區大學佮學校教學經驗無仝

上大的差別就是年齡層無仝;體制裡國高中小學生,因為是部定必修,加上逐家的環境無仝,學習的態度佮用心有差異,效果受限不齊;專科,大學學生心智較成熟,意願懸明顯看著效果;來自社會各領域的社大學員完全出佇自願學習,動機明確,心智成熟穩定,學習意願閣熱切,加上各專業經驗無私的交流,毋若效果自然豐碩,閣培養出相扶持真摯的情誼;社大嘛會當依照學員的程度需求佇課程案排做是當的調整,嘛通透過學習交流,教學方式就採取偏互動討論,營造共同對社區發展事務的關注佮共識,進而成做社區發展的一股力量。

社區大學經營誠要緊的代誌

一般教育體制裡學生的年齡一致,智能佮生活經驗類似,教學課程進度攏照教案課綱進行,社大學員年齡層分布闊,職業社經差異足大,對課程學習的需求佮期待嘛無仝,閣著兼顧舊生佮新加入的學員,怎樣掠出儘量符合整體需求的課程安排,就是對講師真大的考驗佮挑戰,佳哉臺語學習整個來講,逐家的能力準講會曉嘛是干焦聽佮講爾爾,猶閣真要緊的「讀、寫」是大多數學員的需求,國家語言法頒布加上配合教育部十二年國教新課綱母語教師的需求,教育局辦的短期研習明顯無法滿足需求,閣社會各領域也相對發覺母語的重要,母語的學習成做潮流,社區大學教育更加應該積極回應。

講師除了依循即定課程也能依需求適度調整外,就是班長幹部的配合服務,平時除了關心鼓勵學員閣扮演助教角色,更分派收催作業成做逐家的向上學習的助力。閣較要緊嘛感覺真歡喜的,就是班上有位貞熱心閣慷慨的資深學員周士家同學(附照片),佇班上是年齡上大的學生,毋若學習的態度認真,學習能力,成就堪稱一流,足可貴的是真客氣,對新學員主動扮演助教縮短摸索時間,提升新學員的信心,平時服務仝班學員慷慨付出成做班上調和閣合作的核心人物,嘛成做社大推展活動和課務的重要助力,實在是逐家的福氣。

結語

母語政策的推捒,政府必須要有明確的規劃佮政策支持;毋過若欲愛予社會普遍使用母語,毋干焦是政府,對家己、家庭、到學校、或者是社會、企業攏愛做伙動員,身為社會大眾的咱逐家,嘛著做伙動起–來,成果才會完滿。因此,設計「全民說母語」的活動,配合媒體的廣告,逐家形成共識,達到自然使用母語,族群間互相欣賞,互相尊重,按呢國家就能處處和諧,不再瀰漫族群對立、暴戾之氣。向望逐家要記得當初參與這個工作的熱情佮使命,毋通躊躇,勇敢繼續打拼,將講臺語變成做全民的運動,愛拼才會贏!

相關文章

陳亮萌_16
2023-12-21
歐式經典美食-教學經驗分享
羅雅軒_01
2023-12-20
動動手動動腦一起玩線手編織
林欣諭_04
2023-12-19
新手老師養成