傳傳祖先舊話語，接接文化新臺灣

2023-12-19

撰文：張日東

結緣新中和社區大學的起致（khí-tì 緣起）

「傳傳（thuân-thn̂ g，傳承）祖先舊話語，接接（tsih-tsiap，接續）文化新臺灣。」

人講：「食甲老學甲老，食一歲學一橛（kue̍ h）。」（註解）兩年外前陳金泉老師紹介我來新中和社區大學投課，會記得頭擺拄欲開班的時，干焦5个人來報名，人數猶無達到開班的門坎，佳哉有誠疼惜咱臺語文的陳金泉老師來鬥相共（tàu-sann-kāng，幫忙），和咱社大足認真拍拚（phah-piànn，打拚）咧推捒（thui-sak，推展），才予這班順序開起來，到這陣咱臺語師資初階班嘛已經有25个學員矣！
註解：「食甲老學甲老，食一歲學一橛」，一橛即是一段，意味活到老學到老，每增加一歲就多學了一段人生經歷。

學員出擢（tshut-tioh 傑出）的表現，通過國家語言能力認證考試

學員內底有誠濟是佇咱社大上課了後，通過教育部認證考試中高級以上，這陣有足濟人已經是學校的臺語老師，其中也有通過專業級的（這遍全國干焦5个人提著專業級，有一位老師就是咱這班的學員），另外也有閩客語文學獎的詩人、臺語愛四句聯的作者，閣有真濟予日東蓋感心的學員，這馬我就沓沓仔（ta̍ uh-ta̍ uh-á，慢慢地）來共這个臺語師資班的經營佮教學經驗來和逐家分享。

中和所在好倚起
早期農礦來起致
日人時代挖塗炭
兼鑽石油幾若線
若欲論起地號名
請恁靜靜斟酌聽
中坑漳和字相叨
取頭抾尾是中和
古早平埔蹛佇遮
分做擺接秀朗社
臺北廳志有記載
十大庄頭的事代
現時八景名聲敨
靈地寶穴好跤兜
白馬圓通烘爐地
透底遊客上蓋濟
有閒相招來𨑨迌
臺灣正港是寶地

以上是臺語師資初階班講義頭一頁的教材，我寫這篇先來紹介在地地名的起致，咱佇社大教課，定著愛對在地的歷史文化有了解，閣愛結合在地的風俗民情、地理特性、生態環境和學員做伙來研究。

教學重點：對生活的層面來講起

以臺語課來講，欲講的範圍闊莽莽（khuah-bóng-bóng，廣闊），所以我就針對咱生活中的食、穿、蹛、交通工具、地理環境、生物野獸、農作植物、宗教禮俗、人情世事、新聞報導、諺語俗語各方面，來共編寫一本較十全（tsa̍ p-tsn̂ g，齊全）的講義。

講義的編排愛注意著咱佇社大教冊，逐期攏有新學員會入來，頭前會當囥一寡固定的基本教材；閣較重要的是舊班底的基本學員愛顧會牢，所以不糝時（ put-sám-sî，隨時）愛補充一寡新的教材内容，舉倒來講，我有佇公視臺語新聞咧做配音報新聞，我就會掠重點，佇上課的時，來紹介一寡生活上的實用語詞，閣有新的語詞欲按怎用臺語正確共講出來……咱若愈用心來教，學員就會愈專心來學，講師佮學員的互動，就會成做一種良性的循環，佇疫情期間，阮這班的人數，毋但無較少，閣顛倒加誠濟出來！

學員紹介佮互動

人講好酒沈甕底，大魚藏水底，佇社大教冊愛予學員有學著物件，才是咱的主體。這馬我就來分享學員上課的學習情形佮一寡予我誠感心的代誌～佇學員內底有一位兄哥周士家，阮攏共叫士家兄，雖然伊的年紀有較大，毋過伊的學習精神，是眾人的範頭（pān-thâu，模範），伊平常時誠熱心社大的代誌，各種社大的活動會來鬥相共（tàu-sann-kāng，共襄盛舉），對班上佮社大做誠濟服務，閣定定（tiānn-tiānn，經常）下課了後一逝路（tsı̍t-tsuā-lōo，一趟路）誠遠，專工載我轉去三峽，予人真感心；士家兄對臺語的熱誠佮疼惜真正予我足感動的，咱佇本文拄開始的時，有講著「食一歲，學一橛」，士家兄伊有誠豐富閣寶貴的人生經驗，特別是達觀的生活態度佮無私奉獻的精神，成做社大學員佮我上好的學習對象；另外阮這班的美娟姊，雖然伊規部（phō）頭毛已經白疏疏（pe̍ h-se-se，白髮蒼蒼），毋過伊的學習精神煞是熱怫怫（jia̍ t-phut-phut，積極熱絡），伊拄來上課的時，對臺語文字猶誠生疏，閣較免講彼款親像豆芽菜的臺羅音標，毋過伊上課蓋認真，轉去到厝共講義的臺語文字，一字仔一字寬寬仔（khuann-khuann-á，慢慢的）讀，臺羅音標，一音仔一音共記起來，這馬美娟姊仔已經有法度佇阮臺語班群組的line，正確用臺語字表達出伊的學習心得感想，嘛會當用臺語文回答我佇上課時間以外，不時佇line提供予學員的補充教學佮問題，予我上感心的是，伊閣定定共社大學著的臺語，提轉教孫，予臺語有傳傳（thuân-thn̂ g，傳承），這對一个講師來講，就是上好的支持力量！

期末的聯誼活動，坐中央是士家兄，正手爿（tsiànn-tshiú-pîng，右手邊）是當咧讀教育大學臺語研究所的學員陳建鈞（阿鈞），倒手爿（tò-tshiú-pîng，左手邊）就是講師日東。

現任的班長吳兆平老師，較倚正爿雙手尋（siâm，環抱）佇胸前彼位，伊受邀請做專題演講，有誠濟學員去聽。

學員有認真拍拚的態度，學習成果誠出擢（tshut-tioh 傑出）

阮這班的學員，逐个的學習熱情佮兢心（kin-sim，積極）的態度，真正予我的心肝穎有誠燒烙（sio-lō，溫暖、窩心）的感覺！阮頂期的班長聯絡人阿鈞，伊原本是國中自然科的理化老師，伊講伊就是欲來學正氣正範（tsiànn-khuì-tsiànn-pān，經典道地）的臺語，伊誠認真足拚勢，來社大上課，尾手閣去讀國立教育大學臺語的研究所；猶有一个學員，原本日時仔咧做掃車路的清潔工課（khang-khuè，工作），來上課了後，有考著臺語中高級認證，這陣嘛有佇學校咧教臺語矣。閣有兆平兄，伊是阮這班的聯絡人，上課蓋認真，服務熱心，主動牽教新入來的學員，閣共臺語教材的學習心得整理甲誠點陳（tiám-tîn，有條不紊、鉅細靡遺），伊這陣嘛有佇幾若間學校教臺語，閣受邀請，去做臺語演講，推捒（thui-sak，推動）臺語文化。

提高臺語層次，消除刻板印象

佇阮這班師資初階班，資深的學員會主動來教新入的學員，學員佮學員嘛會互相討論學習內容，我上課的時，會邀請學員起來分享學習心得。假使學員若有問題，隨時會當佇群組來問，我若看著，嘛會隨回答，無論是佇我日時仔的上班時間、暗時仔食飯時間，甚至三更暝半，攏會當問。我嘛定定佇群組頂面，補充臺語資料，設計題目予學員做練習，鼓勵學員盡量來參與佮分享心得，目的是欲引領逐家提懸臺語的層次，迒（hānn，跨越）過語言的界線，消除外界認為「臺語人干焦活佇家己世界」的刻本印象，欲予學員講會出臺語媠（ suí，美）媠佇佗位，無論聽、講、讀、寫逐項攏無問題，建立自信，提昇層次。